Ehraam ka bayaan :
♦♦♦♦♦♦♦
Ehraam ka libaas pehankar Umrah ya Hajj ki Niyyat karke Talbiyah padhne ke baad jo paabandiya aa'id hoti hain ya’ani ba’az halaal cheezen haraam ho jaati hain, use ‘Ehraam’ kehte hain.
**************
♦ Chand zaroori baaten :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Ye yaad rakhen ke sirf Ehraam ka libaas ehraam nahi.
(2) Mardo ke liye baghair sili 2 chaadaren ehraam ka libaas hai.
Islaami behne sila hua ehraam ka libaas pehnengi.
(3) Ehraam ka libaas pehanne se pehle naakhoon katar len, khat banaayen, moo e bagal aur zere naaf door karen. Mard chaahe to sar mundayen ke ehraam me baal ki hifaazat se najaat milegi.
Phir ghusl karne aur badan kapdo par itr lagayen.
(Agar Niyyat se pehle ehraam ke libaas par khushbu lagaana chaahe to aisi khushbu na lagayen jis ki taiy kapdo par jam jaayen jaise mushk wagairah.)
Hajj ya Umrah ke ehraam ki niyyat karne ke baad libaas ya badan par khushbu nahi laga sakte.
(4) Hajj ka ehraam Ash'har-ul-Hajj me ya’ani Shawwaal, Zil Qa’ada aur Zil Hijja ke ibtidaai 10 dino me hi baandh sakte hain. Is ke ilaawa hajj ka ehraam baandhna Makrooh hai.
**************
♦ Ehraam ka tareeqa :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
Mard Sile hue kapde aur mauje utaarkar 2 bagair sili hue nai ya dhuli hui chaadar pehne. Ek chaadar ka tehband (lungi) baandhe aur dusri chaadar odh len. Paise, haabi, zaroori kaagazaat wagairah rakhne ke liye tehband ke upar kamar patta (belt) baandh sakte hain.
Ehraam ki chaadar is tarah odhen ke kandha khula na rahe. (Daanya kandha khula rakhne ka hukm sirf Tawaaf ke waqt hai. Baaqi har waqt kandha khula na rakhen.)
Miswaak aur wuzu karke agar makrooh waqt na ho to ehraam ki niyyatse 2 rak’at nafl namaaz Surah al-Kaafirron aur Surah al-Ikhlaas ke saath padhen.
****************
♦ Ehraam ke masaa'il :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Ehraam ki nafl namaaz padhne ke baad Hajj e Tamattu waale sirf Umrah ki Niyyat karenge aur phir Zil Hijja ke 8we chaand Hajj ki niyyat karenge.
Aur Hajj e Qiraan karne waale Umrah aur Hajj dono ki ek saath niyyat karenge.
(2) Aurten Haiz ya Nifaas me ho tab bhi ghusl karenge aur ba-tahaarat ehraam baandhe. Aisi islaami behane ehraam ki niyyat se namaaz nahi padhengi lekin Umrah ya Hajj ki Niyyat karna laazmi hai.
(3) Na-samajh bache ne khud ehraam baandha ya afwaal e Hajj ada kiya to Hajj na hoga. Balke us ka wali us ki taraf se afwaal e Hajj ada kare magar Tawaaf ke baad ki 2 rak’at namaaz bache ki taraf se wali na padhega.
Baap aur bhaai dono ho to baap arkaan ada kare.
(4) Samajh waala bacha khud afwaal e Hajj ada kare. Baaz baaten (Rami wagairah) chhod de to us par kaffaara laazim nahi. Yunhi na samajh bache ki taraf se us ke wali ne ehraam baandha aur bache ne koi mamnu’ kaam kiya to baap par kuchh kaffaara laazim nahi.
(5) Bache ki taraf se ehraam baandha to us ke sile hue kapde utaar den. Tahband aur chaadar pehnaayen aur un tamaam baato se bachaayen jo muhrim ke liye na-jaai'z hai aur Hajj faasid kar diya to qaza waajib nahi agarche bacha samajh waala ho.
****************
♦ Wo kaam jo Ehraam me Haraam hain :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Mardo ke liye sila hua kapda pehanna haraam hai. (Aurto ke liye jaa'iz hai).
(2) Mardo ke liye munh ya sar kisi kapde wagairah se chhupaana,
Sar par amaama, topi, roomaal ya kapda rakhna,
Sar par kapde ki gathri ya basta wagairah rakhna.
(Aurte sar par roomaali baandhegi. Islaami baheno ke liye aisa naqaab waala burka jis ka naqaab chehre par mas ho haraam hai).
(3) Mardo ke liye haath ke mauje pehanna haraam hai. (Aurto ke liye jaa'iz hai).
(4) Wast e qadam ya’ni ungliyo aur takhno ke bich ka hissa jo ubhra hua hai use chhupaana. Mardo ko aise joote pehanna ke jis se ubhra hua hissa chhup jaaye haraam hai.
(5) Jism, Libaas ya baalo me khushbu lagaana ya kisi khushbudaar cheez se dhona.
Khaalis khushbudaar cheezen jaise mushk, ambar, jaafraan, jaavintri, long, ilaychi, daar chini wagairah khaana.
Ya aisi khushbu ko kapde me baandhna jis se us me khushbu ho.
(Agar ye cheese khaane ya saalan me pak gai ho aur khushbu aati ho to ab khaana jaa'iz hai. Maslan – Kachi ilaychi ya long khaana haraam hai lekin ye cheezen khaane me pak jaane ke baad jaa'iz hai.)
(6) Mardo ke liye Wasman (khizaab) aur baheno ke liye mahendi lagaana haraam hai.
(7) Naakhoon kaatna ya katarna, chaahe apne ho ya dusro ke.
(8) Apne ya kisi dusre ke sar se paanv tak kahi se bhi baal kaatna ya sar ke baal mundna ya kaise bhi juda karna.
(9) Joo maarne ki har koshish wa tadbeer haraam hai.
Joo maarna ya nikaalkar phenkana, Joo maarne ke liye kapde dhona ya kapde dhoop me daalna ya baalo me joo maarne ki dawai daalna ya joo maarne ke liye ishaara karna.
(10) Jima’a (sohbat) karna ya shehwat ke saath aurat se bos o kinaar ya badan mas karna ya bad-nigaahi karna.
(11) Be-hayai ki baaten karna, Jhut, Gheebat, Chugli, Gaali bolna, Kisi se dunyaawi ladai jhagda karna.
(12) Nikaah karna, Nikaah karaana ya Nikaah ka paighaam bhejna.
(13) Jangali jaanwar ka shikaar karna ya us ki taraf shikaar karne ka ishaara karna ya kisi tarah bataan a. Ise zubah karne ke liye chhoori dena, ande todna, par ukhedna, paanv ya baazu todna, us ka doodh dohna, us ka ghosht ya ande pakaana, bhunna, khaana, bechna, kharidana sab haraam hai.
****************
♦ Wo kaam jo Ehraam me Makrooh hain :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Ghusl karte waqt badan ka mail chhudaana.
(2) Baal ya badan ka koi bhi hissa bagair khushbu ki cheez se dhona.
(3) Is tarah sar khuzaana ke baal toote ya joo ke girne ka andesha ho.
(4) Kanghi karna.
(5) Surma lagaana.
(6) Singaar karna.
(7) Khushbudaar phal ya patta (jaise nimbu, naarangi, pudina wagairah) ki khushbu jaan-bujhkar sunghna aur itr wagiarah ki dukaan par is garz se baithna ke khushbu se dimaag muattar hoga.
(8) Mahekti khushbu haath se chhoona. (Agar haath me lag jaaye to haraam hai.)
(9) Khushbudaar kapda pehanna ya odhna.
(10) Kurta wagairah pehanne ki tarah kandho par daalna.
(11) Be-sila kapda rafu kiya ho ya paivand lagaaya hua pehanna.
(12) Munh par patti baandhna ya naak wagairah munh ka koi hissa kapde se chhupaana.
(13) Takiye par munh rakhkar sona.
(14) Gilaaf e Ka’aba ke andar is tarah daakhil hone ke gilaaf shareef sar ya munh se lage.
(15) Baazu ya gale me taaweez baandhna agarche be-sile kapde me lapeta ho.
(16) Baghair uzr badan par patti baandhna.
(17) Chaadar odhkar uske aanchal me girah lagaana.
(18) Tehband ke dono kinaaro ko girah dena.
(19) Tehband baandhkar kamar-band ya rassi se kasna.
♦ Wo kaam jo Ehraam me jaa'iz hain :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Ehraam ki chaadar ke kinaaro ko tahband me thonsana.
(2) Kisi cheez ke saaye me baithna. Chatri ke saaye me rehna.
(3) Miswaak karna.
(4) Baghair mail chhudaye nahaana.
(5) Kapda dhona (jab ke joo maarne ki garz se na ho).
(6) Be-khushbu surma lagaana.
(7) Ehraam se pehle jo khushbu lagai us ko lagaaye rakhna.
(8) Aisi khushbu ko chhuna jis me mahek nahi jaise lobaan, sandal wagairah.
(9) Khaane ya saalan me khushbudaar cheez pak jaaye agarche us se khushbu aati ho tab bhi jaa'iz hai.
(10) Sar ya gaal ke neeche takiya rakhna.
(11) Naak par apna ya dusre ka haath rakhna.
(12) Kaan kapde se chhupana.
(13) Munh aur sar ke siwa kisi aur jagah jakhm par patti baandhna.
Aurto ke liye mumh ke siwa sar jakhm par patti baandhna jaa'iz hai.
(14) Foda ya funsi phod dena.
(15) Toote hue nakhoon ko juda karna.
(16) Aankh me se jo baal nikle use juda karna.
(17) Sar ya badan is tarah khujaana ke baal na toote.
(18) Angoothi pehanna jab ke shariat ke mutabik ho (ya’ni ek nang ki angoothi jo saade chhar maasa se kam wazan ki ho).
(19) Bagair sile kapde me lappet kar taawiz gale me daalna.
(20) Bairoon e haram ki ghaans ukhedna ya darakht kaatna.
(21) Paaltu jaanwar jaise oont, gaay, bakri, murgi wagairah zubah karna, pakaana, khaana aur us ka doodh dohna, ande todna, bhunna, pakaana, khaana.
(22) Khabees wa mooji jaanwar jaise cheel, kawwa, chooha, girgit, chhipkali, ssanp, bichhu, khatmal, machchhar, makhhi wagairah ko maarna.
****************
♦ Mard aur Aurat ke ehraam me farq :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Islaami bahene sile hue kapde, mauje, dastaane pahen sakti hain.
(2) Islaami bahene baazu ya gale me sila hua taaweez pahen sakti hain.
(3) Islaami bahene pair ki ubhri hui haddi chhupa sakti hain.
(4) Islaami baheno ke liye baalo ko jamaana jaa'iz hai.
(5) Islaami baheno ko sar chhupaana hai.
(6) Islaami bahene gilaaf e ka’aba sar par rakh sakti hain lekin munh ko bachaaye hue.
›› Ehraam ki haalat me Wuzu ya Ghusl karne ke baad badan ko kapde se ponchhe nahi balke aise hi sukhne den.
›› Eharaam ki haalat me badan par chaadar ya kambal wagairah odhe to khayaal rakhen ke paanv aur sar khula rahe garden tak hi odhen.
***************
›› Umrah ki Niyyat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
Allāhumma inni ureerd ul umrata fayassiraha lee wa taqabbalha minni wa a’inni alayha wa baarik lee feeha navayatul umrata wa ahramtu biha lillāhi ta’ala.
Aye ALLĀH Main Umrah ka iraada karta hu ise tu mere liye aasaan farma au rise meri taraf se qubool farma au rise ada karne me meri madad farma aur is ko mere liye barkat waala bana. Maine Umrah ki Niyyat ki aur khaas ALLĀH ke liye maine is ka Ehraam baandha.
›› Hajj ki Niyyat :
‾‾‾‾‾‾‾‾‾‾‾‾‾‾‾‾‾‾‾‾‾‾‾
Hajj e Tamattu’ aur Hajj e Ifraad akrne waale 8wi Zil Hijja ko ya is se pehle Hajj ka Ehraam baandhkar is tarah Niyyat is tarah karen :
Allāhumma inni ureerd ul hajj fayassiraha lee wa taqabbalha minni wa a’inni alayha wa baarik lee feeha navayatul hajj wa ahramtu biha lillāhi ta’ala.
Aye ALLĀH Main Hajj ka iraada karta hu ise tu mere liye aasaan farma au rise meri taraf se qubool farma au rise ada karne me meri madad farma aur is ko mere liye barkat waala bana. Maine hajj ki Niyyat ki aur khaas ALLĀH ke liye maine is ka Ehraam baandha.
›› Hajj e Qiraan karne waale Umrah aur Hajj dono ki ek saath Niyyat karenge :
Allāhumma inni ureerd ul umrata wal hajj fayassiraha lee wa taqabbalha minni wa a’inni alayha wa baarik lee feeha navayatul umrata wal hajj wa ahramtu biha lillāhi ta’ala.
Aye ALLĀH Main Umrah aur Hajj ka iraada karta hu ise tu mere liye aasaan farma au rise meri taraf se qubool farma au rise ada karne me meri madad farma aur is ko mere liye barkat waala bana. Maine Umrah aur Hajj ki Niyyat ki aur khaas ALLĀH ke liye maine is dono ka Ehraam baandha.
›› Umrah ya Hajj ki Niyyat karne ke baad foran 3 martaba Talbiyah (Labbaik) padhen. Mard thoda buland aawaaz se aur Aurten dheemi aawaaz se padhen.
****************
ALLĀH ta’ala us ke Habeeb sallallāhu alaihi wa sallam ke sadqe me
Sab ko Hajj e Baitullāh ki sa’adat ata farmae.
Aur jo khushnaseeb Mo’min Hajj ke liye jaa rahe hain un ki Hajj, Umrah, Tawaaf aur Ibaadat ko qubool farmae.
Aur un ki tamaam jaa'iz duaen qubool farmae.
Aameen.
